I luoghi della memoria/‘U bizzolu i Marturanu nei ricordi del poeta Lillo Sergi

05.12.2016 20:31

05 dicembre 2016   20:37

Posted by Domenico Salvatore

 

La poesia (vernacolare) di Pasquale 'Lillo' Sergi

 

"'U bizzolu ‘i Marturanu" (Inedita)

 

Tanti bbelli bizzola canusciu
Faciva unu sulu però scrusciu
‘A sira don ‘Erculi non durmiva
Bagghjiòli d’acqua e ‘ndi ‘mmutiva

‘U corsu all’ arba s’ animava
‘A giuvintù d' u Petitti riturnava
Sonnu mi si curca non ‘nd’ aviva
‘U bizzolu i Marturanu inchiva

Iorna misi e anni lesti passaru
Tanti pathruni d’ u bbarri cambiaru
‘U bizzolu è sempri 'ddhà 'bbandunatu
I nui mai cchjiù dimenticatu"

 

**************************************

"Vicky...'a sopravvissuta" (Inedita)

Iatta bbella ‘nd’avisti furtuna
Cu’ l’occhji eri tutti chjiusi
Nira però purtavi sfurtuna
Non ti vòsuru ddhì superstiziusi

L’ unica i ‘stu scuru culuri
Bbrutta fini era pronta pi' ttia
Si diciva chi portavi duluri
Mi garbasti però sul’ a mmia

Sempri bbonu eu ti thrattai
Bbella china sì e c’ u pilu lucenti
Felinu sì e non t’ u sperdi mai
‘Ffascinanti sverta e ‘ndipendenti

‘Na cosa puru però scoprìa
Si tant’ amuri ci duni
Voli bbeni sulamenti a 'ttia
Mai però quant‘ u cani o so’ pathruni

foto di Lillo Sergi.
 

 

Cerca nel sito